تعلمى فن صبغات الشعر

السلام عليكم ورحمة الله وبركاته

الدرس الأول فى فنون صبغ الشعر 

أولا لازم نعرف إن فى فرق ما بين الصبغات وبين الهايليت 

الصبغات بتضيف لون على الشعر وتغلفة باللون دة أما الهايليت بيقوم بتفتيح لون الشعر حتى الدرجة المطلوبة 

طبعا الأتنين مضرييين جدا للشعر بس هنقول إية بقى لازم نغير عشان الزهق .........

فى أنواع كتيرة لصبغات الشعر بدون أمونيا وبدون ماء أوكسجين وناس كتييير بيتعشموا فيها قوى على أساس إن هى مش بتأذى الشعر لكن بعد إستخدامها بيلاقو مفيش لون اصلا لإن فى رأيييى أنا الشخصى إن الصبغات دى أتعملت لشعر الأجانب الخفيف اللى فتلتو ناعمة ولونو فاتح مش ذى العرب معظم لون الشعر بيكون من إسود فحم إلى البنى الفاتح غير إن شعر العرب تقيل وفتلتة قوية عن الأجانب .

نصيحة لذوات الشعر الإسود جدا جدا :.لو شعرك حالتو مش كويسة قوى بلاش تفتحية أو تصبغية صبغة أكتر من درجتين تفتيح وإلا هتكونى بتقضى عليه .

لازم نعرف إن فى أنواع وتركيزات لماء الأوكسجين 

1. أوكسجين تركيز 10%ودة للبشرة الحساسة للحواجب وشعر الجسم.
2. أوكسجين تركيز 20 % ودة بيستخدم مع بودرة التشقير اللى لونها أزرق لتشقير شعر الوجة والجسم.
3. أوكسجين 30% ودة بيستخدم مع بودرة التشقير البيضاء المخصصة للشعر والصبغات وبتكون الهدف منها الحصول على الألوان البنية والأحمر وهو الأفضل لعمل الخصلات الذهبية وهو يعتبر المفضل بالنسبة لى.
4. أما بقى الكبيييير قوى اللى تركيزو 40% ودة بقى يستخدم للشعر الأسود لتفتيحو وعمل خصل تلجية بس مش بحبو ومش بنصح بإستخدامه لأنو بيأذى الشعر أكتر من تلوينو.    

من أشهر وأحلى الصبغات اللى برشحها هيا ويلا كوليستون أو بالييييت أو بيس .وهما دول الأفضل 

وعشان تصبغى شعرك هنحط مع اللون اللى عاوزينو لون تانى فاتح يساعد اللون الأولانى.

طب هتسالونى لو أحنا عاوزين نعمل صبغة وعليها هايلات هقولوكو بين الصبغو والهايلايت على الأقل أسبوع أو عشر ايام راحة بينهم.

طب لو هفرد شعرى قبل الصبغة يبقى على الأقل أسبوعين قبل الصبغة بعديها لالالالالالا لأن الفرد بينزل الللون بتاع الصبغة وهياكل الشعر وهيتساقط ويتقصف .

أدوات الصبغة اللى نجهزها عشا نصبغ بقى إممممممممممممممم:.

فازلين :.عشان نحط على الوجة والرقبة والودان.

غطاء بلاستيك للشعر.

فرشة لتلوين الشعر.مشط واسع.

وعاء بلاستيك وغير معدنى للصبغة.

جوانتى للأستخدام عشان نحمى إيدينا الحلوة.

طبعا الصبغة والأكسجين:.

• يفضل إن الشعر مش يكون مغسول ونحط فازلين أو كريم للوجة على الأطراف الوجة والأذنين.
• فى وعاء بلاستيكى هنمزج اللونين اللى جبناهم مع ترك من كل علبة ربع الكمية من الصبغة عشان الجذور هتسالو طب ليه لأن الجذور بتفتح اسرع كتير من بقية الشعر فبنحطها بعد الصبغة بحوالى ربع ساعة.
• بنخلط اللونين سوا مع ماء الأكسجين بالنسبة لصبغة ويلا كوليستون هنستخدم على كل أنبوبة 60 مل أوكسجين ونحط معلقة شامبو مع الصبغة لتقليل حرارة الصبغة على الشعر.
• هنقسم الشعر أربع أقسام ونسيب 4 سم من الجذور للنهاية .
• بعد ضبغ الشعر بالفرشاه هنغطية بطقية بلاستيك ونخلى الصبغة حوالى 20 دقيقة أو ممكن 15 على حسب اللون يعنى تحسى إن لون شعرك أبتدى ف التغييير بس مش أكتر من 20 دقيقة.
• هنجيب باقى العبوات ونعمل الجذور كلها ونغطيها لمدة 15 دقيقة بعد ما نكون وزعناها كويس باليد أو المشط.
• لو شعرك ما فتحش لونو ممكن نسيبة من 5 إلى عشر دقايق فقط لا غير بعديها أعرفى إن شعرك عمل اللى عليه وزيادة وأكتر من كدة يبقى أسمو بتر على النعمة.
• هنشطف الشعر كويس جدا بالماء وبعدين نغسلة بالشامبو مرتين لحد ما ينظف خالص ونحط بلسم ونسيبة شوية ونشطفو كويس.
• طبعا الشعر وهو مغسول أو مبلول هيكون لونوا أغمق من وهو ناشف ومعمول سشوار أو بيبى ليس.
• يفضل أنك تقصى أطراف شعرك بعدها وتستخدميلو شامبو وبلسم مخصوصين وترطبية على طول بحمامات الكريم.
• عشان تتخلصى من بقع الصبغة بمعجون أسنان ونفرك ونغسل بالماء البارد.    

وبين الصبغة والتانية بلييييييييييييييييييييييييييز 3 شهور مش أقل عشان شعرنا حبيبنا مش يبوظ .

ودى هدية منى ليكو  

1. للحصول على لون بنى فاتح هتجيبو لون بنى فاتح+لون أشقر رمادى+أوكسجين 30%.
2. للحصول على لون عسلى فاتح هتجيبو لون أشقر بندقى+أشقر تلجى فاتح+أوكسجين 30%.
3. للحصول على لون كستنائى هنجيب كستنائى فاتح+أشقر رمادى فاتح+30%.
4. للحصول على الاشقر الفاتح هنجيب أشقر فاتح+أشقر فاتح جدا+30%.

أنتظرووووووووووووووووووووووووووونى فلدى المزيد والمزيد فقط مع سوبر ليدى